揼一個煙頭換一身傷聽過未？呢啲咪係食署嘅「傑作」囉。呢，尋日朝早荃灣有位胡生喺河背街街市買完餸，突然煙癮起，煲完一支之後，懷疑順手將煙頭掟落地，咁啱畀三個喺現場巡視嘅食環署職員見到。

當街揼煙頭斷到正，循例被檢控要罰千五蚊。胡生唔忿被罰，激動起嚟突然情緒失控，拒絕出示身份證，夾硬推開食署職員狂奔離去，食署職員即刻通知上峰派人增援。

呢個只係前奏咋，跟住嚟至係「戲肉」。胡生一支箭咁飆咗大約一百米，上咗架的士準備離開，點知畀食署人員夾硬拉落車，然後仲畀人按落地下拳打腳踢。有目睹事件嘅市民話，當時成車食署人員到場幫拖，十幾個人按住個煙民嚟打，有人甚至專打佢右邊太陽穴。一輪混戰之後，胡生唔止頭部同條腰受咗傷，連價值二百幾蚊嘅斜孭袋都扯爛埋，呢鋪真係人財兩傷咯。

叮！有冇離譜啲呀？隨地揼煙頭係就係唔啱，拒絕接受告票強行離開亦唔能夠接受，但食署使唔使咁誇張，出動到成車人去增援咁大陣仗呀？就算對方拒絕合作，又使唔使十幾個人砌人哋一個呀？唔怪得現場市民睇唔過眼大鬧：「揼煙頭之嘛，使唔使十幾人按住嚟打呀？」

話時話，逼到走投無路不過小兒科咋，食署惡起上嚟，逼到人跳樓都唔出奇o架。呢，今年農曆新年前，有小販入咗大量鮮花想賺番筆，點知啲花仲喺車上，就被食署人員以阻街為名全部充公。小販血本無歸，上到去食環署大樓準備跳樓自殺，好彩畀人勸落嚟，如果新年流流搞出人命，咁就大鑊咯。

食署人員野蠻執法早就街知巷聞啦，前幾年新界有小販畀佢哋追到落荒而逃遇溺身亡；又試過有小販「走鬼」，被追出馬路畀車撞傷。一句講晒，見到佢哋實冇運行。

食環署對市民惡形惡相，呢個部門喺市民投訴榜上長期「穩坐第一」；每年審計署同申訴專員公署嘅報告例牌做主角，員工吞泡、蛇王嘅醜聞爆完一單又一單，但咁多年來，從未有改善。

試問食環署署長卓永興，對手下仲要縱容到幾時？十幾個人砌一個市民，濫用武力去到咁盡，係咪想連內地城管都要南下拜師，搵食署「取經」呀？叮！