仲記得今屆立法會○八年開鑼之初，議會各方勢力合縱連橫，互相挖角、合併，事隔一年，有消息話，由梁劉柔芬、林健鋒、梁君彥同劉皇發組成、俗稱「4L」嘅經濟動力，同由何鍾泰、石禮謙、劉秀成同梁美芬組成嘅專業會議，最近突然「撻着」，大約一個多月前開始行埋，定期約喺中國會見面，就議會內嘅重要議題交流意見。呢個做法行吓行吓，變成好似少男少女玩初戀咁，個心十五十六，唔見唔舒服，依家仲已形成機制，定為每兩個禮拜見一次添！
呢啤政府最穩定嘅護航力量另一個「拍拖」迹象，就係攜手撐港府嘅政改方案嘞。以經濟動力牽頭嘅「工商界政改動力」，最近失驚無神改名為「工商界專業政改動力」，原來係扯緊紅線，真正底蘊係為方便專業會議加盟，以後兩者就可以光明正大「拍拖」出遊，唔使閃閃縮縮。
為咗畀個名分專業會議，「工商界專業政改動力」仲度緊改架構，由只有林健鋒一位召集人，變為由兩頭馬車領軍，何鍾泰擔任另一位領軍人物，負責統籌聯繫專業界別參與者。經濟動力連名分都畀埋專業會議，仲唔係想有意發展更深層次關係？