經過高鐵撥款一役，年長一輩好多都話唔明「80後」諗緊乜。身為「50後」嘅港大校長徐立之都話同「80後」嘅兩個仔喺一啲問題嘅睇法上有鴻溝，好似兩個仔年齡差兩年，但喺多倫多大學畢業時，都不約而同選擇剃光頭參加畢業禮以示抗爭。徐校長話真係唔理解兩個仔咁做為乜，可能係無聲抗議佢管束太多，借光頭刺激佢啩。
不過，徐校長唔明唔緊要，佢好尊重兩個仔，既然佢哋願意一世人一次嘅大學畢業相以光頭示人，佢雖然唔認同但都冇反對，亦冇太激咁鬧仔。好彩剃光頭只係為表態，兩個仔之後都好正經，冇再做光頭仔。
佢又話對待學生都係一樣，會尊重佢哋有唔同睇法，但最緊要係提醒佢哋要守法，否則後果自負。