原來佢以前嘅愛駒先後兩度參加打吡，可惜都同三甲無緣。今次捲土重來仲打孖上，點計都着數過人。講贏面，郭老闆話較睇好「締造美麗」，因為呢匹愛駒跑法主動，若然排到靚檔位，守住三甲衝線都未定；「美麗傳奇」就愛留前鬥後。邊匹叻啲？要鬥過先知。

十四匹馬今次碰頭較量，郭老闆唔敢輕敵，佢話：「麗豐控股林建康嘅『勇敢小子』喺香港六戰六勝，未輸過；另一匹參賽馬『君子一言』亦係兩戰兩勝。」但論「吸水力」，「締造美麗」過去三年合共贏得近九百萬元獎金，相對購入價僅三十幾萬銀，表現有晒交代。難怪郭老闆錫到「締造美麗」燶，就算佢幾忙都好，每月一定抽時間入馬房餵「締造美麗」食紅蘿蔔，搞到連太太都話呷醋。