大話講一百次會變真？

鬍鬚曾尋日喺電台節目《給香港的信》同市民講番最新一份嘅預算案，內容乏善足陳，不外乎重提香港依家面對緊嘅挑戰，話政府要保持警覺，另外又再次翻兜佢喺預算案嘅「德政」，好似聽多一次短版嘅預算案咁，聽眾一個唔覺意隨時會瞌着。

呢份預算案劣評如潮，但佢偏偏隻字不提各方對預算案嘅批評，只係一味講佢認為有用嘅政策，好似講多幾講就真係有用咁，咪以為大話講一百次就變成真先得㗎！聽到佢呢封全無新意嘅信，本來諗住熄機瞓吓，點知佢忽然話，好開心見到佢第三份預算案得到香港市民大眾嘅接受喎，瞓着咗都當堂畀佢激到彈起啦！預算案嘅評分愈嚟愈低，鬍鬚曾仲好意思話大家接受，你話有冇搞錯？

鬍鬚曾認為自己嘅預算案已經提出咗短期同長期措施，相信可以提升香港嘅競爭力，亦可以幫到低下階層解決眼前困境，又話庫房多咗嘅收入都已經同市民分享咗，講到如果其他人仲有不滿就係你自己嘅問題咁。

鬍鬚曾咁大言不慚，睇嚟除咗反映佢自己打咗懵仔針自我陶醉之餘，仲想順便麻痹埋市民嘅大腦，令大家都覺得佢嘅預算案係天上有地下無。佢自己做懵仔就算啦，但咪當啲市民都係懵仔先得㗎，以為咁就可以過骨？邊有咁易呀！