小白觀點：難怪「80後」一事無成

國唔怪之得有人話「官不聊生」啦，大家睇睇依家啲高官行出嚟好似過街老鼠咁，左閃右避唔肯面對市民，好嘞，今次唐英年算係有啲傻勁，出嚟扮吓親民做騷，又畀人當標靶咁掟鞋，毫無官威尊嚴可言。

今次見唐唐畀人掟完，仲笑騎騎咁款，睇嚟好似幾有風度，不過我睇得出佢其實好唔服氣，事關今次係一個大好嘅機會畀佢登上國際掟鞋名人堂，如果個「80後」醒少少掟準啲，等佢使出一招神龍擺尾踢番轉頭，《葉問3》主角非唐唐莫屬。

冇計啦，聽聞嗰位後生仔失業咗好耐，咁近距離都掟唔中，兼毫無力度，可見佢可能真係三餐不繼食唔飽，最弊佢完全冇「掟鞋力學」基本知識，唔知兩隻孖埋一齊掟有好大風阻。所以話呢，呢班「80後」連掟鞋咁簡單都未掟掂，一事無成可以怪得邊個？

Email：sunsiupak@gmail.com

Blog：http://sunsiupak.blogspot.com

阿豪觀點：唐唐待遇與國際接軌

好嘢！香港政治人物終於同國際接軌喇！唐唐前日出席青少年論壇嘅時候，有後生仔向佢掟鞋抗議，只見佢氣定神閒，並冇驚惶失措，唔通唐唐已經進身布殊嘅級數？不過諗諗吓，會唔會只係嗰個後生仔冇乜準繩度，隻鞋偏離目標太遠呢？

講開掟嘢，大家不妨估吓，如果隻鞋真係掟得夠應，香港有邊個高官真係可以避得開吖嗱？本來鬍鬚曾武功高強，應該唔單止可以避得開，玩吓手仲可以放番暗器打對方嘅穴道，不過佢依家身體咁，會唔會跌watt就唔知喇！至於其他高官，一個二個文弱書生咁，畀人掟中後嗌痛睇怕都慢幾拍啦！

唉，唔係話豪伯崇洋，你睇吓人哋外國領導人成日鍛煉身體，普京連老虎都打得死，自然不在話下，就算係布殊都鍾意玩越野單車啦（雖然試過仆崩個鼻）。台上一分鐘，台下十年功，我哋都係唔恨得咁多喇！

Email：lukchiho75@hotmail.com

Blog：http://lukchiho.blogspot.com

網友觀點……

傻仔：我懷疑條友仔掟得中嘅話，唐唐未必夠反應快避得切。

小白臉：冇厘創意學老外掟鞋，要掟都搵第樣吖！

春仔：橫掂啲高官冇乜建樹白高薪，畀市民出吓氣都好！

失業漢：唐唐嬉皮笑臉，完全感受唔到我哋嘅無奈！