嗱，早排有不法之徒假借開外匯投資公司高薪請人，居然要求新員工投資高風險產品，仲要搵埋屋企人攞錢出嚟投資，然後就話投資失敗，一鋪清袋。有啲公司更加係掛羊頭賣狗肉嘅色情架步，有女學生貪圖「薪高糧準」，卒之誤入火坑，欲哭無淚。

有人可能會話，唔使驚，仲有勞工處吖嘛，正如電視廣告話齋：「搵嘢唔容易，不過講到搵工，有勞工處協助就好得多喇！勞工處嘅就業中心遍布港九新界，有好多設施協助你搵工，好工就喺呢度，搵工？去勞工處喇！ 」

講就講得幾好聽，但如果你信以為真，咁就弊傢伙喇。呢，有辦畀你睇o架，十九歲嘅阿煒中五畢業後透過勞工處網頁搵到一份文員工，月薪八千蚊，喺依家咁嘅時勢，算唔錯嘞。可惜當佢簽咗約，開開心心返工嘅時候，先至知道畀人搵笨，所謂文員，居然要出街派傳單，仲要孭住一塊廣告牌嚟派。

以為做文員，點知做咗人肉廣告板。阿煒條氣梗係唔順啦，佢同老細投訴，老細竟然要求佢自行辭職。阿煒於是簽字劈炮，點知兩日後收到公司嘅信，要佢賠一個月代通知金。

話時話，招聘廣告貨不對辦不特止，仲要屈人哋賠錢，咁做法好無良啫。正如有人力資源專家話齋，勞工處一定要對呢間公司作出譴責。奇怪嘅係，當阿煒向勞工處投訴時，對方居然話愛莫能助喎。

叮！簡直豈有此理，呢份工喺勞工處網頁搵嘅，依家出咗事，勞工處點可以側側膊o架？就算份工唔係勞工處介紹嘅，當局亦有責任保護勞工權益啦，點可以一句愛莫能助就關人個關？

其實，提起勞工處嘅所謂職位空缺，好多人都媽媽聲。首先，資料一啲都唔update，好多空缺早就請咗人，令求職者白跑一趟。更弊嘅係，勞工處根本冇審查，搞到龍蛇混雜，好多資料失實。例如舊年有一個飲食業公關小姐嘅職位空缺，只要求中三學歷、略懂英文，時薪高達八十蚊，點知原來係請卡拉OK伴唱小姐，仲係專門服侍日本人添。勞工處咁搞法，同推人落火坑又有乜嘢分別？

講番阿煒嗰單畸士，本報記者睇唔過眼，出面向勞工處查詢，勞工處職員先至話會跟進。唉，政府靠得住，豬乸會上樹，太一叮忠告各位求職人士，搵工時千祈唔好信晒勞工處，否則，畀人賣咗豬仔都唔知發生乜嘢事。叮！