小白觀點：火鍋送煙頭不另收費

好多人話香港係美食天堂，本欄就唔太認同嘞，要食好嘢，梗係北上啦！嗱，先嚟一間近近哋喺深圳嘅麻辣火鍋店，唔係講笑，在下試過，好食到想翻尋味。當然啦，佢哋落足料加罌粟，有乜辦法唔食完心思思呢你話。不過，最正都係嗰個牛油麻辣鍋底，特別夠味，特別夠多料，原來佢哋次次喺坑渠撈番上嚟回收再用，所以呢，有時喺鍋底撈到有煙頭、紙巾，千祈唔好大驚小怪，呢啲不另收費，送嘅。

跟住就應該試吓西安嘅街頭羊肉串，嗰種羶法真係搵勻全世界都冇，一直好想知道佢哋用嘅係乜嘢羊肉、點樣腌肉先吊到啲味出嚟。呢個秘方近日畀人公開，原來佢哋選用上等死貓肉，再用羊尿浸一段長時間，所以非常有咬口之餘，亦都好入味。

嗱，呢兩個米芝蓮星級推介冇介紹錯啩，有冇興趣周末上去試吓呢？

阿豪觀點：控制人口免地球陸沉

喺內地食嘢真係一步一驚心，學者鍾南山建議改革制度，指定一個部門管理食品安全，認為咁就可以根治問題喎……

雖然鍾教授一片好心，但豪伯始終認為，內地食品問題根本係一個死結。呢嗱，話口未完，西安又有黑心烤羊肉串嘞。嘩，真係講起都得人驚，竟然夠膽死搵貓肉、鴨肉以羊油、羊尿浸泡出羶味。試問呢啲街頭特色小吃，會唔會咁神心拎去食物檢測部門驗清驗楚呢？

不過話分兩頭，食品安全問題，其實有可能係內地人口政策嘅重要組成部分。有專家指出，問題羊肉串對人體健康嘅危害比含少量三聚氰胺嘅毒奶大得多。大家諗吓嘞，喺咁多有毒食物嘅圍攻之下，中國仲仍然有十三億人口，如果樣樣嘢都咁乾淨嘅話，人口起碼飆升至二十億啦，到時唔單止中國頂唔順，成個地球都要陸沉呀！

網友觀點……

混毛豬：若把關嘅官員受賄開方便大門，乜部門都冇符啦！

善有善報：內地咁多無良商人，因無神論思想唔信因果報應！

海公公：差唔多食得入口嘅都可能有毒，唔驚得咁多喇。

草食男：中國喺德國攞咗個老翻大獎，唔知幾時攞埋最毒食品獎呢？