舊年喺金融海嘯衝擊下，好多大學籌款艱難，城市大學喺上個財政年度慘蝕七億二千幾萬元，所以要加大力度撲水，最近就搞咗個「成功導航計劃」籌款活動，邀請一班企業家錄製短片，同學生分享成功之道。
今次有九位成功人士分享人生經驗，富臨飯店創辦人楊貫一係其中一個，由於佢臨時抱恙未能出席，於是愛女Cecilia楊慕琴代父出征，而喺短片亦睇到阿一做人嘅座右銘。阿一話做人做事都要中肯同有信譽，仲要做到「人無我有，人有我優，人優我更優」，唔怪得佢至今仍屹立不倒啦！
阿一愛女Cecilia其實來頭唔細，係全球著名快遞公司TNT集團華南區總經理。佢話自細喺父親身上學到好多嘢，包括勤奮、投入同專注，而且要以誠待人，唔怕蝕底。
城大校長郭位為第一輯《成功人士系列》成功推出感到高興，話依家社會物欲橫流，短片可激勵學生，學習無私奉獻精神，現正籌備第二輯。