球伯係製衣界嘅元老，亦曾經年輕過，又拚搏一生，當然對人生有好深嘅體會。早前佢為城大錄咗一段短片，佢喺片中話：「勤勞總唔會吃虧，大不了被人家取笑你資質愚鈍，將勤補拙。」

小問題勿掉以輕心

畀人話鈍都得？唔係呀？聽埋先。球伯話成與敗往往取決於一個唔顯眼嘅細節，所以佢堅持事事用功，對小問題從來唔掉以輕心，跟住佢仲好風趣咁話：「做人有夢想、有目標係啱，但要逐步逐步……小事不管變大事，大事不管變出事。」又話遇見問題，若果唔及早處理，想解決時就為時已晚喇！話音未落，全場即爆笑，事關球伯點中要害。

做過城大校董會主席嘅合和實業主席「哥頓」胡應湘，都有畀面拍咗段短片。哥頓話一個人成功與否有好多因素，而且每個人悟性同努力程度都唔同，但最重要係對周圍事物有好強嘅觀察力。