又有消息傳出「肥媽」Maria Cordero會喺新界東參加立法會補選，挑戰辭咗職嘅社民連「長毛」梁國雄。肥媽尋日承認考慮緊參選一事，但參選與否要先過家人嗰關，又表明唔認同五區「公投」，認為爭取普選要循序漸進，既然有議席出缺，咪考慮參選囉！
聽聞肥媽背後，係身兼立法會議員同沙田區委任區議員嘅林大輝幕後發功，但人在北京開兩會嘅大輝聽到傳聞之後立即否認，重申絕無此事；至於肥媽真係參選嘅話，佢都會睇睇各參選人嘅政綱先決定支唔支持。
繼「白姐姐」白韻琴有意參選九龍西後，肥媽係第二位有意參選嘅娛圈中人。另一立法會議員葉劉淑儀尋日知道肥媽想參選後，話依家好似出親嚟選嘅都係娛樂圈中人，不如索性將補選當成娛樂節目咁睇啦！