海協同海基兩會舊年十二月喺台中進行第四度會議，台中市市長胡志強以地主身份邀請海協會會長陳雲林參訪台中市政建設，好似七期重劃區咁，兼暢遊日月潭。政制及內地事務局局長林公公林瑞麟同商務及經濟發展局局長Rita劉吳惠蘭聯袂率團訪台三日，行程節目幾乎倒模照抄，尋日登上台中最高嘅亞緻飯店頂樓，鳥瞰台中；今日則赴日月潭，聽日就會參觀台中七期重劃區建設。
之不過，陳雲林參訪台中，唔止開放畀記者採訪，即使因場地限制，亦畀記者派代表拍攝，再統一供稿。反觀林公公同Rita，除咗喺機場、飯店接受記者採訪同發表談話，其餘行程幾乎全部「密封」，唔對外開放，記者幾經協調先至同意隨行在旁拍攝，但亦唔接受採訪。林公公同Rita以咁保守謹慎嘅官僚作風訪台，港台關係發展行得慢過兩岸關係，有乜咁出奇呢？
對於香港代表團唔肯公開行程畀傳媒採訪，台灣官員以尊重香港方面為由，唔表示意見；而香港工作人員則解釋，指行程未定，需等台中市政府安排確定，先至能對外公開喎。不過，台灣方面嘅接待人員就向記者爆料，話呢啲行程陳雲林好多都去過，當時並冇排斥媒體拍攝，對港府官員態度如此保守謹慎，惟有講句「大開眼界」！