本來已冇嘢好做，可能佢諗到冇嘢好諗，竟然重操故業，做番佢嘅老本行—推銷員。呢次唔係推銷西藥或政改方案，而係佢成日匿埋喺裏面嘅禮賓府。

讚禮賓府吸引好多遊客

煲呔曾尋日喺網誌度話，聽日係禮賓府開放日，指禮賓府嘅面積同裝潢雖然唔及得英國白金漢宮同美國白宮，但喺香港人心目中一樣具有特殊地位，所以每年都吸引好多市民同遊客，舊年到訪人次仲係近年之最。

佢仲提及喺殖民地年代，禮賓府唔單止係港督嘅官邸，仲係英國皇室成員同其他貴賓訪港嘅居所，好似英女王、王儲查理斯同已故嘅戴安娜王妃都入住過；而喺末代港督肥彭年代，多位國際知名嘅歌影星亦曾作客。之不過，煲呔曾隻字不提佢做咗「住客」後，有乜貴賓入住喎！facebook都爆晒出嚟啦，咪就係畀班「80後」登堂入室玩鋪勁，暴露禮賓府好似無掩雞籠囉，咁醜怪，梗係唔敢宣之於口啦！

吹完一輪水之後，佢話今年有個新猷，就係搵咗幾十個導賞員，為參觀嘅市民講解禮賓府嘅歷史同特色等等，佢仲沾沾自喜咁話，喺上個禮拜班導賞員去禮賓府實地考察嘅時候，親自帶佢哋睇過一轉，仲自詡做咗「導賞員嘅導賞員」。

勢估唔到佢竟然無聊到連導賞員都撈埋，咁不如喺開放日親自帶團啦，但佢嗰幾日又放假喎。咦！咁啱上次都係喺佢外訪期間，畀班「80後」闖入禮賓府禁地，不如呢次佢搵番「和平分手」嗰個家務員肥仔返嚟，帶班市民重遊班「80後」遊覽禮賓府嘅路線，再去BBQ，咁先係與眾同樂嘛！