04/03/2010

播放本新聞相關短片

綠色生活咪齋噏 虎頭蛇尾要不得

有冇聽過白色污染?冇錯,就係埋入地下唔能夠分解、焚燒又會毒化空氣嘅膠袋同發泡膠嘞。周圍都見嘅發泡膠即棄飯盒,就係白色污染其中一個最主要源頭。

港府成日話提倡綠色生活,但對付白色污染成績認真麻麻。有立法會議員要求政府提供過去三年全港中、小學飯盒回收狀況嘅數據,環境局局長邱騰華尋日書面回應,只攞得出二○○八年嘅數據。

環境保護署○八年嘅調查顯示,全港每日大約有五十五萬名學生喺學校食晏,其中用可循環再造飯盒嘅只得三成;用可再用器皿嘅僅過一半;而使用包括發泡膠盒在內即棄飯盒嘅,接近兩成。

可循環再造飯盒打碎後可做塑膠原料,當局話,呢種飯盒全港學生每日使用約十六萬個,但回收商只能夠處理約十萬個,其他嘅就要送去堆填區。叮!明明可以循環再造,卒之又係變垃圾,唔該政府諗吓辦法解決,咪得個噏字啦。

保護環境係人都支持,嗱,當局舊年十月開始推動《環保午膳約章》,鼓勵學校使用可再用餐具,盡量喺現場按學生食量派飯菜,減少廚餘,避免浪費,到二月有二百七十間學校簽署咗約章。

另外,施政報告舊年宣布預留五千萬元推行中央派飯計劃,資助學校搞基本改裝同添置相關設施。當局話,已經接獲一百八十間學校申請資助,反應理想。實情係,全港約一千間中小學,中央派飯申請僅佔約兩成,直頭係反應冷淡。

有學校話,如果按機電工程署睇過學校之後嘅建議做,改建工程費要一百二十萬左右,即係當局預留嗰筆數至多夠四十幾間學校用,剩低一百三十幾間就算有心過「綠色生活」,水頭唔夠,一樣「綠」唔起來。

叮!環境局好明顯冇做好功課。正如有小學校長批評,好多學校都想參加,但校園地方細,難以搞中央派飯,「唔係搞個計劃畀人睇就叫做好」。

講真,中央派飯既環保,又減少浪費,更可以畀同學食到新鮮熱辣嘅飯菜,本來可以好好推廣實施。當局根本就係後知後覺,甚至純粹為咗做場環保騷至搞到踢晒腳。

話時話,環保午膳計劃比邱騰華之前提出嘅乜鬼「停車熄匙」呢類效果成疑嘅擾民措施有效得多,早就應該調撥足夠資源去推行。家陣學校有意搞中央派飯,但係僧多粥少,資源唔夠分,呢個政府認真搞笑。

其實,港府同學校對環保午膳已經有共識,當局估計一般個案可以喺今年暑假動工,趕及新學年前完成。如果政府有心推動綠色生活,就要講到做到,盡快落實增撥資源,千祈咪又好似以前嘅環保項目咁,虎頭蛇尾,最終不了了之。叮!