城中最大教師團體之一嘅香港教育專業人員協會四月就會換屆，依家嘅會長係立法會議員張文光，唔講唔知，佢坐咗呢個位成二十年，早前佢已放定風話想搵接班人。尋日教協公布改選名單，城市大學社會科學部高級講師馮偉華被提名做會長，張文光就退居二線做副會長。按照教協嘅公告，今個月五號同二十六號就會舉行選舉，會內消息話，馮偉華擔大旗十拿九穩㗎喇，仲話遲啲可能接埋立法會議席嘅棒添。
張文光早排先講過，佢哋物色接班人好耐，但就顧慮多多，因為有啲可造之才冇心做會務，又擔心個會被有心人滲透，所以搵人時好小心翼翼。言下之意即係馮偉華都算「你辦事、我放心」嘅人啦，而馮偉華早前已做咗終極普選大聯盟嘅召集人。
睇番馮偉華嘅履歷，佢讀書同教書都係社工本科，由大學年代到家吓，曾經喺校內校外有唔少抗爭經驗。○三年，城大因為政府撤資，一度想停辦以副學士課程為主嘅「高級專業學院」，馮偉華同唔少教職員進行抗爭，亦因此識咗張文光，之後仲畀張文光搵埋入會添。有人話，馮偉華喺教協嘅年資唔算耐，但就好投入，或者因為咁，咪被揀為新旗手囉。