04/03/2010

播放本新聞相關短片

政情:陳南祿細女背城借一

新高中學制推行後,今年四、五月舉行嘅香港中學會考將會係末代考試,太古(中國)主席陳南祿(Philip)話,自己個讀緊中五嘅細女Michelle今年就係末代會考生,將面對香港歷史上最後一次會考,佢形容女兒今次係「背城借一」,希望佢努力考好啲。

末代會考生冇得重讀

Philip嘅大仔Kelvin前年中喺美國讀完經濟畢業返港後,依家已經做緊一份穩定工作,難怪做爸爸嘅咁緊張細女啦。由於今年會考係最後一次,成績唔好只可以重考一次,但就冇機會重讀,所以末代會考生同末代會考生家長都唔易做。

出過幾本書嘅Philip出口成文,呢句「背城借一」更係出自《左傳.成公二年》嘅成語,話說戰敗國齊國向晉國求和,可惜晉國開出的條件過分苛刻,齊國惟有收拾最後兵力,背住城池作最後決戰。Philip以此形容細女考試,真係好凝重噃!