樓市熾熱，港府壓抑樓市卻有招無力，花拳繡腿，信佢嘅就傻喇。行政會議成員梁智鴻同白鴿黨立法會議員甘乃威不約而同喺預算案公布前高追買樓，甘威寧花七千幾蚊一呎買樓，都唔想再做無殼蝸牛，金刀梁就同太太再買樓收租，佢哋嘅行動直頭係向鬍鬚曾投不信任票啦。
甘威之前租住西環巴丙頓道某單位，一月十四號，佢向立法會秘書處申報「喺港島擁有物業」。據解釋，佢嘅舊居不斷加租，咁啱隔籬單位出讓，於是忍痛以呎價七千幾蚊購下。佢嘅新居一千餘呎，按一按計數機，即係分分鐘買入價要八、九百萬元。甘威喺金融海嘯時，買ELN損手爛腳，兩年唔到，又可以一擲千萬買豪宅，從政唔通真係咁好搵？
預算案明明話有壓抑樓市新招，點解甘威等唔切呢？佢話，一早估到鬍鬚曾出嘅招軟弱無力，唔會落重藥㩒樓價。
至於金刀梁就喺原有五個物業基礎上，再以太太名義買咗個港島中西區物業收租。