辯論冇火花 早幾粒鐘散會

尋日十一點，議事廳只係得小貓兩三隻，距離法定人數都差好遠，大家都關注尋日係為期兩個禮拜嘅北京兩會第一日，立法會會唔會即刻整單流會事件出嚟呢？秘書處按照慣例響鐘，通知議員開會時間已到，響咗一分鐘多啲，建仔嘅李慧琼、陳克勤、黃定光、工聯會嘅王國興等魚貫步入議事廳，何鍾泰同Miriam亦喺人潮之中。咁多議員一齊現身，流會危機梗係解除啦。正所謂救場如救火，建制派留人開會總算有驚無險。

不過，尋日嘅立法會大會氣氛好淡靜，由於約十個議員上咗北京開會，泛民又有五員辭職，令到立法會空櫈多多，即使有公文袋嘅余若薇提咗個有關補選嘅動議，議員辯論都冇乜火花，大會更較平時提早幾粒鐘結束。

講番建制派留人開會，尋日所見，最少有三個身兼人大嘅立法會議員留港，包括何鍾泰同Miriam等。按照兩會慣例，全國人大代表都會列席政協嘅開幕大會，但尋日何鍾泰、Miriam同另一位身兼港區人大嘅議員不約而同留港，擺明係奉旨撐場啦，以便其他身兼政協嘅議員可以準時出席政協大會。

至於佢哋，人大會議遲兩日先開幕，佢哋喺香港撐場後，今朝可以心安理得咁坐早機上京，即使北京有重量級活動，佢哋都趕得切。