小白觀點：職業司機攞人命較飛
虎年啱啱開始，真係馬路如虎口，幾乎日日都有交通意外，巴士、小巴、的士輪住嚟搵人咬，唔到你唔驚！豪伯講到繪形繪聲咁話係流年不利，小白老弟就唔係好贊同嘞，講到底分明係人禍至真。
一日都係當局闊佬懶理，甚至縱容專營巴士同埋小巴公司訂立每日達十四小時工時，咁開工法，鐵打都頂唔順啦！此外，香港職業司機嘅駕駛態度真係好有問題，冇錯，有時為咗賺多啲，走多兩轉係無可厚非，但都唔好拎乘客同路人條命嚟較飛吖！
有次三更半夜上的士即瞓，點知行咗都冇兩分鐘，突然畀一陣比火車聲仲勁嘅鼻鼾聲嘈醒，哇，原來個司機喺度睡駕、夢駕，嚇得我吖！所以為咗自己條命仔着想，小白老弟立志盡快考番個的士、小巴牌，下次車費當然畀足啦，不過麻煩請司機坐去乘客位，等我自己揸安全得多。
Email：sunsiupak@gmail.com
Blog：http://sunsiupak.blogspot.com
阿豪觀點：市虎難絕育自求多福
台灣今年舉行一年一度嘅新春燈會，點知樂極生悲，虎形主燈後方放出嘅煙花射向群眾，造成三十三人受傷。專家話主燈以開口虎為造型，狀似開口吃人，係凶兆云云。
你都咪話唔信邪呀，原來台灣上一個虎年同樣以虎為造型舉行燈會，當時已經畀人話目露兇光，結果當年台灣真係發生多宗空難……
之不過，香港雖然冇舉行燈會，但踏入虎年之後，似乎應咗「馬路如虎口」呢句老話—本來救人嘅白車都可以危駕幾乎撞死人，日前又有小巴司機突然發羊吊，釀成一死五傷嘅慘劇。
唉，如果係真老虎出沒就話易搞啫，中國人咁鍾意獵殺野生老虎，一早已經搞到老虎幾乎絕種，依家先至話開始協助飼食嘅老虎重返大自然；但係講到市虎喇喎，就真係愈繁殖愈多後代，靠政府幫佢哋「絕育」，倒不如匿埋喺屋企唔出街好過！
Email：lukchiho75@hotmail.com
Blog：http://lukchiho.blogspot.com
網友觀點……
阿貴：法例冇規定職業司機要驗身，對行人乘客嘅安全毫無保障！
犀利哥：今次就發羊吊啫，下次會唔會遇到個發神經㗎！
陳福水：亡命小巴、殺人白車再加埋暗病司機，諗起都唔敢行街！
搵命博：後生司機就怕佢係車手，老司機又驚隨時病發……