按新嘅安排，每日有十二班跨境巴士可以喺文錦渡進出，雖然同市民原先要求嘅二百班車差咗一大截，但過境人士總算唔使吓吓兜大圈嘞。其實留番條路畀人行，都唔係好難啫，點解要拖到依家先至做呢？

講真，成件事實在好離譜，文錦渡口岸話大唔大，話細唔細，每日都有成萬人過境，忽然封關就玩殘呢啲過境人士喇，平時二十幾分鐘嘅路程，要行成三四粒鐘，交通費貴咗成倍，佢哋有乜法子唔媽媽聲呀。最慘係分居深港兩地嘅夫妻，往日可以晚晚相聚，依家為咗慳錢慳時間，只好少啲見面，難怪有人狂批政府「拆散中港家庭」。叮！

因乜事搞到要封關呀？港府話喎，文錦渡要進行口岸改造工程，屬於深圳市政府嘅大型基建計劃咁話。即係話，責任在於深圳，唔關港府嘅事。

話時話，深圳當局確實係有好大責任，為咗起一座聯檢大樓，居然封關三十個月，咁嘅事喺全中國都少見。就算係一個家庭，都唔會因為內部裝修將門口封兩年幾啦，何況係中港之間嘅重要通道，咁重大嘅事情，點可以由深圳單方面決定㗎。更弊嘅係，事先唔打聲招呼，話封就封，實在太兒戲！

對深圳嘅做法，港府唔可以粒聲唔出，應該同廣東方面溝通，協商兩全其美嘅安排。可惜特區政府班高官，平時將粵港合作掛喺嘴邊，但真係要同對方交涉嘅時候，就個個都變咗縮頭烏龜，粵港合作機制更係形同虛設。

其實深圳改建文錦渡口岸，從來都唔係乜嘢秘密，○八年中央公布「挺港十四項措施」時，就提過呢個項目，奇就奇在，港府竟然矇查查。正因為港官懶懶閒，成件事先至搞到一鑊泡。仲有噃，封關影響成千上萬市民日常生活，咁大件事，港府竟然可以唔向市民諮詢，實在太官僚。叮！

咪以為安排有限度通關就一天都光晒，其實問題未解決，仲有壓力。你諗吓，日日成萬人過關，十二班巴士點夠呀，特別係節假日，實會七國咁亂。

叮佢個鎯鎯，班官僚淨係識貪方便，根本冇考慮過境人士嘅利益，話之你爭到打崩頭啦。最搞笑嘅係，佢哋一味吹噓口岸改造後嘅美好前景，話可容納多一倍過境人士喎，就唔計吓呢兩年半當中，過境人士喺時間同金錢上嘅損失有幾大。

大佬，畫餅充飢係冇用嘅，如果唔想再出亂子，就快快趣趣同內地商討，作出合理過境安排啦。