立法會新大樓設計早前已經出爐，一班立法會行政管理委員會成員尋日去睇樣辦傢俬同設計模型，佢哋人人都好細心，好似要買樓睇示範單位嘅準業主咁，不過，議員對唔少精心設計都意見多多，譬如議員座位有個獨立風口，或者每人有部獨立電腦等，有啲反對意見都可算雞蛋裏挑骨頭。
新大樓嘅議員席，每席都有一部私人嘅電腦，枱上中間位置仲有一個冷氣出風口，情況好似搭巴士時每排位嘅出風口咁，等議員可以自行調校風向同風力大小，呢個溫馨設計本來係等議員可以調控冷氣，但出名火爆嘅劉慧卿卻好愕然咁話唔明點解風口要吹住議員，身旁嘅李卓人即刻接招：「擺明係用嚟吹熄你啲火啦。」李華明亦加把口，話以後邊個議員講嘢聲大夾惡，可以開行個冷氣吹住佢喎。
挑剔一番後，又有議員嫌枱上個人電腦個顯示屏太大，擔心容易畀人睇到佢哋開會時一心幾用，或者畀人睇到佢哋上一啲唔應該上嘅網頁。啲議員原來唔係諗檢點啲、開會專心啲，而係諗避免點樣唔畀人發現，真係令人擰頭。