本文重點
大笨象滙豐日前公布業績，表現竟然係市場估計嘅下限，搞到尋日大笨象股價大插水，股價跌咗百分之七，收市都只係啱啱企穩喺八十蚊邊緣，悲觀預期加埋有啲打落水狗嘅行動，搞到一年前大笨象供股時嘅恐慌又靜雞雞復活。會計界立法會議員陳茂波（Paul）尋日力排眾議，力撐大笨象，仲話估股價可以喺年內有雙位數增長添。
「象友」張建東一股都冇
陳茂波一向係大笨象嘅好友，認為呢間銀行有實力，加上金融海嘯後滙豐可能有機會收購一啲經唔起考驗嘅銀行，可令資產更加穩健。佢認為，依家市場信心弱，正係入貨嘅好時機，預期一年後大笨象股價都會唔錯。
行會成員張建東（Marvin）都係大笨象好友，兼係滙豐控股非執行董事，但佢手頭一股滙豐都冇。Marvin話，以前做會計師嘅時候，滙豐係佢公司嘅客戶，所以唔買得滙豐股票；到後來可以買嘞，佢又因工作忙唔記得；依家做咗滙豐非執董亦都冇買，因為賣出買入要申報同審批，結果拖嚟拖去，呢個「象友」手頭都係零滙豐。