傳統戲曲源遠流長，讀開番書嘅匯賢智庫主席葉劉淑儀都係戲迷之一，喺啱啱過去嘅農曆新年假期，佢先隻身飛咗去北京兩日欣賞京劇，上禮拜五又去尖沙咀文化中心睇粵劇，撞正隔籬位係「汪阿姐」汪明荃，佢哋睇戲之餘，仲傾咗好多當晚劇目嘅背景，令葉劉對粵曲嘅了解多咗好多。
葉劉○六年喺美國史丹福大學修讀文學碩士，又喺東亞研究系進修中國文學，先秦小說、歷代戲曲，一般都難唔倒佢，不過，上禮拜五嘅曲目係《香花山大賀壽》同《胡不歸》，《胡不歸》大家聽得多，當日做小生嗰個正係汪阿姐嘅老公羅家英，但《香花山大賀壽》講乜呢？葉劉話，汪阿姐相當好人，見佢有啲唔明白，就即場授課，講解套戲係講觀音娘娘大壽，眾仙家到賀，賣點係功架戲特多云云，聽到葉劉連連點頭，獲益良多。