農曆新年後，泛民陣營要求同中央溝通傾政改方案嘅動作頻仍，有組織甚至開出條件，要求中央承諾雙普選。啱啱過去嘅禮拜日，中聯辦主任彭清華就低調宴請立法會建制派議員，並喺席上明確傳達中央立場，即係唔接納溝通預設前提！
同日下晝，為泛民做「帶信人」嘅全國人大常委范徐麗泰都有見記者，話對泛民上京唔樂觀，談及嘅內容亦係泛民開出嘅條件不合國家依法管治嘅原則，由此可見，泛民想講先決條件根本冇人騷。
舊年十二月中，建制派飯局改喺建仔監委會主席楊孫西嘅清水灣大宅舉行，當時中聯辦高層都有赴宴；禮拜日中聯辦以「回請」為名，喺西環中聯辦大樓頂樓設晚宴，建制派立法會議員基本全部到齊，唔少與會者都話，當晚餸菜屬人民大會堂國宴級，佳餚包括金鈎翅、鮑片同海參。有與會者引述彭清華當晚講到，中央贊成溝通，但溝通唔可以預設前提，一針見血咁回應咗泛民嘅要求，將個波又踢番去泛民嗰邊。
據講，彭清華嘅講話分外有意思，亦畫公仔畫出腸，事關喺中央眼中，上京要求終極雙普選，同公文袋及社民連喺香港搞「公投」爭普選，係殊途同歸，亦係分兩條腿行路。