扮嘢文尋日大讚《歲月神偷》拍得好好，佢一路睇就感覺好似返咗去老香港咁。曾經做過市建局成員嘅扮嘢文話，希望當局唔好拆永利街，佢透露，雖然市建局早喺○三年已經敲定咗上環嘅重建項目，但都希望重新審視成個發展，收回成命，將永利街保留落嚟。

政府發展計劃屢破壞古蹟

扮嘢文指過去港府唔少發展計劃都破壞咗好多古蹟，實在好可惜，希望以後小心啲，為香港保留多啲舊日足迹，咁樣年輕人可以認識以前嘅香港，保育之外仲有教育意義。扮嘢文定居香港多年，早幾年更攞埋香港身份證，佢對老香港嘅感情同一般香港人真係完全冇分別，難怪佢咁珍惜呢啲港人嘅集體回憶啦！

先後搞活蘭桂坊同海洋公園嘅扮嘢文仲話，永利街有好好嘅旅遊潛質，如果政府活化項目，應會成為好吸引遊客嘅一個地方。

講番農曆新年，扮嘢文透露佢早前飛咗去泰國布吉，喺當地逗留咗六日，為新開嘅酒店主持開幕禮。扮嘢文又話，雖然喺當地都日日做到冇停手，冇乜機會玩，但喺當地可以着T-Shirt短褲開工，已經覺得好心滿意足嘞！