小白觀點：公園行兩個圈當集訓

國際馬拉松大賽圓滿結束，可惜大家睇唔到選手喺陽光燦爛下衝線嘅動人情景，只係見好多人跑到口吐白沫，幾乎連命都冇埋。因乜事搞成咁？

鬼咩，小白老弟識好多朋友平時的出的入，行多兩步都懶，今次都趁高興玩埋一份，Happy Hour之後，求其喺公園行兩個圈當係集訓，唔死都偷笑啦。冇錯，馬拉松本來係一項好健康嘅運動，但係香港空氣污染成咁，經常伸手不見五指，唔係講笑，阿媽企遠些少都唔認得，唔好話一般孱弱嘅香港人頂唔順，就算係接受過高地低氧訓練嘅專業跑手都未必捱得住。

當年長洲曾經發生過冧包山意外，港英政府理得你係乜嘢民間風俗習慣，禁之可也，因乜事馬拉松咁危險嘅運動仲每年都舉行呢？計我話，下年如要繼續，唔該當局標明「馬拉松會致命」，以免畀人告到甩褲。

Email：sunsiupak@gmail.com

Blog：http://sunsiupak.blogspot.com

阿豪觀點：每日跑半粒鐘仲健康

一年一度嘅香港馬拉松啱啱結束，唔知點解今年會搞到咁大鑊，有好多跑手跑到入廠，有幾個更幾乎一命嗚呼添！到底係香港賽道特別艱辛，根本非常人能應付吖—連非洲人都話熱呀，唔講得笑—抑或係我哋香港人嘅體質零舍孱弱呢？

老實講，豪伯又怕熱又怕煩，大熱天時叫我去跑步喎，真係咪搞。唔知讀者老爺有冇發覺，依家香港地做咩都好似趁墟咁，你睇吓每年馬拉松吖，有幾多人真係認認真真跑㗎，唔係求婚就係着到鬼五馬六咁，總之就係要博出位博上鏡。其實無論遊行示威以至行花市都係咁㗎啦，大家去到逼吓撞吓，除咗聞到周圍啲人嘅臭汗味之外，其實都真係唔知為乜！

計豪伯話齋，如果真係想強身健體，與其一年參加一次馬拉松，倒不如每日跑半粒鐘啦！但係又有幾多人真係會咁做呢？

Email：lukchiho75@hotmail.com

Blog：http://lukchiho.blogspot.com

網友觀點……

馬拉糕：出位馬拉松，又扮猩猩又求婚，出年隨時玩裸跑！

排骨仔：跑到出事皆因孭住唔衰得嘅包袱，值得咩？

C9：下年大會應該提供一人一口罩，以免出意外。

Dday：咁跑法真係玩命，唔知有冇叫跑手簽定生死狀呢？