其他唔講，先講救護車問題。本港救護車唔單止數量不足，好多仲係超齡服役，又殘又舊，行行吓隨時失驚無神跪低。嗱，早兩日荃灣有位老人家心臟病發，據說又係懷疑白車延誤而失救死亡。

呢種悲劇喺香港已唔算新聞，耐不耐就爆一單，不知幾多人枉死。本來呢，要解決問題並唔難，攞十億八億出嚟，買多啲白車，請多啲救護員，咁就搞掂喇，點知政府硬係唔肯做，真係畀佢吹脹。

講開救護車，唔能夠唔提埋公共醫療呢筆蘇州屎。醫管局資源錯配，公立醫院前線人手嚴重不足，搞到醫生工時超長，做到死死吓。近年，醫管局係威係勢搞工時改革，話要減輕前線醫生嘅負擔喎，點知搞嚟搞去得個吉，依家仲有好多醫生每周工作超過六十五粒鐘，唔捱壞至奇。

呢，公共醫療醫生協會調查發現，超過三成受訪者嘅專業枯竭指數達危險程度，其中一成仲想過自殺，佢哋大部分都食過精神科藥物，靠呢啲藥穩定情緒。乜嘢叫做專業枯竭呀？即係過度使用精力而感到失敗、透支，覺得成個人被撕裂咗，嚴重嘅仲會酗酒、濫藥及自殺添，咪話唔得人驚。

呢啲醫生平均年齡只有三十三歲，喺公立醫院平均做咗八年，初初入行時不知幾生猛，老虎都打死幾隻，點知做幾年就捱到謝晒。唉，唔怪之得公立醫院有咁多醫療事故啦。

講到底，都係公共醫療資源分配失當造成嘅。人手不足嘅問題，靠工時改革係解決唔到嘅，一定要調撥資源增加前線人手。可惜嘅係，對呢個關乎市民切身利益嘅問題，預算案係咁意增撥十二億喺公共醫療方面，到喉唔到肺，根本無補於事。

公共醫療資源錯配，反映政府理財問題多多。話時話，一個負責任嘅財爺，使用公帑應該有策略性、針對性，識得集中資源解決迫切嘅問題。但係鬍鬚曾連咁嘅道理都唔識，瞌埋雙眼亂fing一通，結果雖然年年派錢，但問題年年存在，咁咪叫做戇居囉。唔怪之得咁多人話佢唔夠資格做財爺啦。叮！

講真，鬍鬚曾橫睇掂睇都唔似理財專家，最多似古代嘅帳房師爺，甲乙丙丁，一二三四，將所有收支列晒出嚟，就關人個關。如果係咁，使乜花咁高人工請佢做財爺噃，求其搵個會計師都做得好過佢啦。