小白觀點：十九財爺心地唔好

喺財政預算案公布前夕，懲教署突然宣布話唔再因為香煙價格變動調整囚犯工資。以為今次事先張揚囚犯冇糖派，九成九又會搵煙民開刀勁加煙稅啦，殊不知財爺鬍鬚曾呢鋪搞搞新意思，以後只准市民帶十九支煙過關返香港。

表面睇嚟，呢條橋好似冇預期中咁狠毒，不過諗真啲，咁樣搞法其實仲衰過加稅，由此可以睇出財爺係幾咁機關算盡，因為只准市民帶十九支煙，即係話唔畀帶一包完整嘅香煙，買咗包免稅煙要開封掉咁一支。咁搞法，或者遲啲免稅店會有散裝，好似賣冬蟲夏草咁，搵條紅帶綁住十九支賣都唔定。講到尾，成條橋分明就係要玩謝煙民，財爺心地認真唔好。

做煙民一向受盡歧視，今次又再被財爺出陰招玩鋪勁，計我話，十九財爺呢個名，鬍鬚曾真係當之無愧呀！

e-mail：sunsiupak@gmail.com

Blog：http://sunsiupak.blogspot.com

阿豪觀點：淨識學星洲啲衰嘢

新一份財政預算案公布，除咗得六千蚊退稅，令到唔少人媽媽聲之外，相信最令人氣頂嘅，就係入境只准帶十九支香煙嘅規定。好多人話，咁搞法即係玩嘢啫，真接將香煙列作違禁品好過啦！聽講新例實施後，香港將會成為繼新加坡後，第二個完全封殺免稅煙嘅地方。咁就好笑嘞，人哋咁多嘢好學你唔學，好似話生仔有津貼呢啲德政，又唔見你去學吓人哋？

照我睇，呢件事引起咁大民憤，相信唔能夠善罷甘休。大家不妨睇吓啲在囚人士，懲教署早前宣布，唔會再因為香煙價格變動而調整囚犯工資，此消彼長下，即係減佢哋人工。其實呢項措施，當局舊年都想實行，只係因為反彈太大而作罷。呢個政府欺軟怕硬，今年都唔知會唔會因為公務員買煙嘅開支增加而加佢哋人工㗎，到時小市民實行嘈到拆天！

e-mail：lukchiho75@hotmail.com

Blog：http://lukchiho.blogspot.com

網友觀點……

Gary：嘩，咁搞法，囚犯買貴煙，監獄起風雲咯！

超正綜援：囚友勿嬲，洗心革面出番嚟攞綜援補番數！

煙民強：莫講話囚犯吖，市民過關都係得十九支免稅煙咋，食煙好似有罪咁。

才記：財爺十九支煙點定㗎？唔通係求過車公？

有料爆：

話明叫水警，出更劈酒食海鮮有乜出奇？

SMS傾埋一份：6016 2496