四、五月政壇風起雲湧，但建制派有人卻想喺期間組團去內地搭高鐵，仲準備順便邀請埋泛民議員，睇吓有冇機會藉此同內地破冰添。負責牽頭嘅旅遊界立法會議員謝偉俊（Paul）尋日已經準備埋參加表格，連行程、費用同酒店資料都列埋出嚟派畀其他議員，打算復活節長假期間搭高鐵去參觀上海世博會場。
不過，泛民議員對個旅行團大潑冷水，大有集體請阿Paul食檸檬之勢。職工盟議員李卓人話係「搵嚟搞」，唔相信去一轉旅行就起到啲咩政治作用；白鴿黨議員涂謹申就話，個旅行團對冇回鄉證嘅議員嚟講好尷尬，因為個團係自費參加，又唔確定真係入到境，如果到時去唔到就盞搞，所以都係唔諗咁多；公文袋就話要搞補選，所以諗都唔會諗喎！泛民冇心，建制派亦唔見得踴躍，阿Paul嘅師傅金融界議員詹培忠就話復活節預咗去賭場搏殺，對返大陸零興趣。個團成唔成到真係好難講。