白鴿黨嘅甘乃威去年捲入涉求愛不遂怒炒助理事件後，夫妻感情備受考驗，雖然當時甘太身體力行支持甘威，陪同佢出席記招，但都有好多人認定呢件桃色醜聞手尾長。事隔半年，甘威尋日大晒情人節心思，仲話同太太比以前更Sweet添。
今年情人節甘威買咗朱古力畀太太，另加一個可以「戴喺身」嘅禮物，佢唔肯透露禮物係咩，但就話為咗呢份禮物「破財」，太太收到後亦好開心。甘威雖然講得好甜蜜，但今次係唔係為補鑊，真係佢哋兩公婆至清楚。
另外，尋日係IT界立法會議員譚偉豪四十六歲生日，佢一整日都要喺立法會開會，但佢囝囝為表孝心，就喺屋企整定蛋糕，同埋媽咪一齊帶去立法會同爹哋慶祝。
