新一份預算案公布之後，財爺鬍鬚曾幾日嚟分別去立法會、電台、電視台等地方推銷，不過，佢份預算案冷對中產同四無人士，刺激就業亂咁使錢，冷卻樓市又出招無力，搞到好多市民都話失望，紛紛打去電台同佢舌劍唇槍一番。鬍鬚曾反來覆去用官式腔調答覆，連喺中英文電台節目嘅講法都同出一轍，好似借咗林公公嘅錄音機咁，最後都係敗下陣來。
鬍鬚曾份預算案派糖唔少，但冇乜長遠大計，穩樓市又冇乜力，中產鬧爆、基層都冇掌聲，鬍鬚曾去到邊都係捱鬧居多，例如講買樓，佢只係重複話置業係重大人生計劃，依家嘅招數冇效會再出新招，講法同前日一模一樣。
鬍鬚曾冇招可出，惟有靠幾個政策局局長護航，例如發展局局長林鄭月娥一連三日開記招、保安局局長李少光講青少年禁毒計劃同張建宗講支援就業咁，目的都係幫手解畫。
或者，鬍鬚曾派完糖已經謝謝哋，亦可能身體同腦袋都不勝負荷，頂唔住咁激嘅戰事，為免傷患擴大，惟有搵啲副手嚟頂啦。