本文重點
立法會尋日搞咗個新春午宴，一眾高官同行政會議成員齊齊現身撐場，席間仲大玩遊戲添，其中一個遊戲係由高官同議員分組砌成語，過程中，主管教育嘅教育局局長孫明揚老貓燒鬚，一時睇錯字，一時砌錯成語，喺連環出錯之下，仲累到官員隊輸埋添。
台下提水至發覺
議員隊尋日由李卓人、黃定光同譚偉豪出戰，官員隊就有孫公、勞福局常秘鄧國威同民政局局長曾德成。兩隊開戰時，官員隊本來遙遙領先，但到「放虎歸山」呢個成語時，正當成員都花時間搵「放」字，孫公竟然用個「投」字取代「放」字，將個成語砌成「投虎歸山」。
之後佢砌「畫虎類犬」時，就認錯字，將晝夜嘅「晝」字當成書畫嘅「畫」字，結果梗係衰咗啦，仲要台下官員大聲提水至發覺。
之後輪到「虎嘯風生」，孫公又整錯為「虎嘯生風」。就係咁，官員隊就輸咗嘞，呢個故事教訓我哋「精、準、快」三者缺一不可。