忙碌嘅政壇女性可唔可以「入得廚房，出得廳堂」﹖尋日發展局局長林鄭月娥、勞工處處長謝凌潔貞同工聯會嘅陳婉嫻出席一個慈善午宴，期間佢哋被要求趁元宵佳節來臨，搓湯圓籌款，嫻姐一聽到即耍手擰頭。
其實今次搓湯圓真係好簡單，大會一早將芝麻餡同搓好嘅湯圓皮分成細份，只要將湯圓皮㩒扁，放舊餡入去包好再搓番圓就得，但嫻姐明顯冇幾可入廚，猛話自己唔識整，惟有睇住其他人邊睇邊學，結果第一粒出品失敗收場，露出少少芝麻餡，搓第二粒先叫似番啲樣。相反，謝太就明顯唔係生手，見到餡多皮少仲識拎咁啲餡先包，製成品似模似樣得多。
至於林鄭就話自從小朋友長大後就做咗「無飯煮婦」好多年，原先大會叫佢煮兩味就真係咪搞，搓吓湯圓就無妨。