中聯辦尋晚喺會展新翼大禮堂舉行新春酒會，政府高層同政商界人士紛紛捧場，戲肉係主任彭清華發言，會場人士大都留心傾聽，但坐喺台上、代表特區政府嘅煲呔曾卻左顧右盼，唔多留心。彭清華講咗約十分鐘，致辭去到尾段，台上嘅煲呔曾雙眼已經合上，明顯唔夠睡魔打。

嘟嘴

噃醒

當彭清華讀到：「中央政府一再重申，無論香港遇到多大的困難……」，煲呔曾已經墮入夢鄉，瞓咗七秒之後，佢郁郁嘟起嘅章魚嘴，忽然夢醒，然後睡眼惺忪咁望望兩邊尷尬咁笑，隨即點頭假扮留心彭主任發言。煲呔曾瞓着至醒番嘅過程，讀者可以上東方報業集團旗下嘅ontv新聞台睇片。

呢個酒會政界人士雲集，煲呔曾竟然當眾瞌眼瞓，無心戀戰嘅地步真係盲嘅都睇到，最搞笑係佢瞓咗都嘴郁郁，唔通又夢到食好嘢？事關佢日頭同立法會議員食開年飯時，大講自己同老婆去地區名店搵食嘅心得，但佢美其名話咁樣係順便聽民意。

落街食嘢自閉快閃

煲呔曾話，佢落街食嘢都要好小心，因為依家傳媒同舖頭老闆都好醒目，佢一來唔想畀人知，費事做宣傳，二來想趁機聽吓民意，所以搵食都盡量低調，佢仲透露自己嘅策略：坐低就快啲點菜，點好菜就快啲畀錢，隨時留意三樣嘢，一係餸菜係咪好耐都唔上，二係老闆有冇頻頻講電話，三係附近有冇異樣，如果有呢三種狀況，佢就會即刻走人，等落去盞畀人聞風而至。

聽佢咁講，搵食最緊要自閉兼快閃，咁點樣聽民意呀？睇番佢過去幾次落區，據講訂枱時已經講明要求，入到食店坐嘅枱，附近都冇乜人坐，而且佢哋嘅座位又盡量隱蔽，店內食客想埋身都難啦，真係唔知食緊好嘢嘅煲呔曾點樣聽市民心聲嘞！