中產階層對稅呢家嘢一向最敏感。無他嘅，上有老，下有少，樣樣開支都要自己扲荷包。對佢哋嚟講，減稅等於派糖，望都望政府稅抽少啲，自己手頭可以鬆動啲，日子自然好過啲啦。

可惜，新一份財政預算案稅務同差餉寬減措施計落得雞碎咁多，唔止令經濟壓力最大、社會福利受惠最少嘅中產大失所望，更令佢哋怨氣加深，好多人批評呢份預算案幫唔到中產，直頭唔合格。

嗱，睇真啲就會發現，預算案提出嘅所謂紓困措施都係一鋪過，並冇觸及稅制變更，當局隨時可以加番，根本就係搵笨。

就算一次性措施，都應該做得好好睇睇啩？港府居然仲諗縮數打倒褪，好似薪俸稅咁，舊年百分百寬免，以八千蚊為上限，今年只寬減百分之七十五，仲將上限降低到六千蚊。

淨係咁樣一降，全港一百四十萬納稅人入面，有資格盡享呢項稅務寬減嘅，得番唔夠四成，咁少人受惠點紓解民困呀？

查實中產要求並唔過分，作為納稅嘅主力，家陣經濟環境好咗，如果政府可以提高子女、供養父母免稅額，抽稅唔好抽得咁狼胎，已經飲得杯落咯，但港府對呢啲訴求根本聽唔入耳，完全當中產透明唔存在。

提起供養父母免稅額，真係要炳多港府幾嘢。鬍鬚曾喺財政預算案猛噴口水，話當局提倡「居家安老」，會推行長者家居護理試驗計劃，要做到「居家安老為本、院舍照顧為後援」咁話。

叮！講吓就得。請問財爺，知唔知照顧一位老人家要幾多資源，屋企人又有幾大付出㗎？中產家庭得唔到政府幫助，依家百物騰貴，樣樣都要慳住使。供養父母免稅額一個崩都唔肯加，港府下巴輕輕齋噏「居家安老」，中產階層顧自己都掹掹緊，有心無力點安老吖？

畀呢個縮骨政府算過，真係草都冇得生。嗱，係人都知，由於資源投放不足，安老院舍資助宿位長期供不應求，每年都有兩千幾長者喺輪候期間辭世。新嘅財政預算案話會增撥一億六千萬，額外提供超過一千個安老院舍宿位，但依然係僧多粥少，遠遠滿足唔到需求。

畫公仔唔使畫出腸嘞啩。資助宿位嚴重短缺，港府就叫公公婆婆留喺屋企，連增加供養父母免稅額都拒絕，根本就係將照顧老人家嘅責任推番晒畀市民，中產階層更首當其衝。當局以「安老」名義嚟棄老，仲有冇離譜啲吖？

叮佢個鎯鎯！港府唔好再扮嘢嘞，不如直接啲將口號改成「居家安老搵笨、院舍照顧無期」仲簡單易明啦！