騙徒神棍識揀目標

根據一項調查顯示，去年百萬富翁嘅數目大幅上升，有近四十萬人咁多，最特別嘅係，原來當中有好多都係師奶。

小白老弟對於呢單新聞一啲都唔覺得奇怪，雖然近年通街都係騙徒神棍，唔係講笑，細佬從來冇遇過，唔係因為特別機智精靈，而係在下乃個個月都清袋嘅「月光族」，騙徒見到仲唔掉頭走？之不過師奶就唔同嘞，隨時攞得出幾十萬畀人呃，你就知佢哋幾疊水啦。

所以呢，如果大家想進身百萬富翁行列，真係要諗吓辦法釣師奶喇，千億富婆唔同你玩One Love，都希望可以博吓百萬師奶玩「瘟仔」啦！當然，單係靠學吓挖窿打洞未必一定得，最重要係整吓副尊容，嗱，唔使幫襯整容醫生㗎，先去刮光個頭，再PK落地撻到豬頭又崩牙咁款，到時成為師奶界萬人迷囉喎，出年又多隻百萬富鴨嘞。

專業人士踩人發洩

唔知點解，講起師奶，大家一定要搭單加一個「肥」字喺前面，再唔係就叫人哋做「哥師拉」，但係硬係聽唔到人嗌「靚師奶」又或者「索師奶」，更加唔見已婚麻甩佬有咩專門名詞嚟形容。查實我哋唔單止唔應該取笑師奶，仲應該好尊重佢哋，如果唔係肥師奶養到你咁大，你會有今日？

至於點解大家要醜化家庭主婦，豪伯終於知道答案，原來係因為人哋係富婆！最近有銀行統計過全港有近四十萬百萬富翁，其中大部分係退休人士同埋家庭主婦！師奶儲私己錢叻就大家都知，但係原來佢哋投資有道，竟然成為百萬富翁嘅主力大軍。嗰班自命精英嘅專業人士，日日OT食無定時，搵埋搵埋都唔夠相夫教子嘅主婦多，試問如果唔用「精神勝利法」，開口埋口叫人做師奶，心理又點會平衡呀？

網友觀點……

調查員：師奶咁單純？喺電話隨隨便便就透露自己有百萬資產？

小　肥：真係可憐啲打工仔，做極都唔夠C9勁。

晴　晴：都係轉行做師奶好過，唔使受氣，日日炒吓菜之餘又炒吓股，咁就百萬！

口水威：若果師奶富婆人數多過窮師奶，咁就真係值得研究喇。