棋哥預告今年個會喜事多，年中會舉辦協進會二十一周年盛大晚會，年尾仲請到全國人大副秘書長喬曉陽來港出席「政經論壇」。佢帶頭自揼心口捐出五百萬元，信置主席黃志祥捐出五百萬、四洲集團主席戴德豐捐三百萬、福建幫頭領盧文端捐二百萬、香港興業主席查懋聲捐一百萬、全國政協委員朱蓮芬同「新金王」黃英豪各自捐出五十萬，新地董事郭炳湘都認捐咗五百萬，屈指一算已籌到逾二千萬。

棋哥喺春茗上遇見「深圳王」黃楚標隨即揼人心口，叫佢起碼認捐三、四百萬，黃楚標唔敢托手㬹，話同棋哥上京開兩會時慢慢傾。