街工今年成立二十五周年，佢哋喺立法會嘅議員梁耀忠亦計劃出自傳，仲搵埋岑建勳、許鞍華等演藝界人士幫佢寫序。阿忠話，佢同岑建勳相識二十幾年，仲話岑建勳曾經係佢嘅明燈，但亦曾經搞到佢成個人謝晒，好down（低落）。
唔好以為佢哋有乜斷背戀情，只係阿忠二十幾歲仔去英國讀書時，人細兼唔知社會發生緊咩事，識咗岑建勳後，岑同佢講咗唔少社會問題、啟迪佢乜嘢係左翼思潮，令佢認識工運，好似一盞指路明燈咁。
但係，七八年阿忠由英國返港後，發現佢嘅明燈變咗，因為曾經批評選美制度歧視女性嘅岑建勳，竟然走去做選美會司儀，呢盞明燈令佢一時之間無法接受，所以咪成個人謝晒囉。