煲呔曾語帶輕佻咁話：「選舉制度係有漏洞，不過冇辦法，玩一次都要！」將動用一億五千萬推行嘅補選工程形容為「玩一次」，真係佢先噏得出口。政黨玩嘢已搞到香港人被迫荷包流血，煲呔曾又冇厘認真，選舉事務處嘅公務員會唔會見到上頭係咁，亦放軟手腳玩吓呢﹖一場補選咁樣畀人玩法，筆錢真係使得冤枉囉！

搵孫女出嚟寸政協

講開煲呔曾，佢尋日趁北京召開兩會前，同六十幾名本港嘅全國政協會面，據有份出席嘅黃英豪引述煲呔曾話，特區政府每年都會喺北京設酒會，希望各位政協多多捧場，但就要「口殊」喎。煲呔曾以自己兩歲孫女為例，話孫女一睇到電視播出中國國歌時就會嘟起嘴發出「口殊」聲，示意大家留心。

佢雖然笑笑口咁講，但心水清嘅人都知去年北京酒會，煲呔曾致辭時台下氣氛嘈過街市，冇人聽佢吹水，佢即時黑晒面。依家早早打定招呼，明顯仲記住一年前嘅事，只係暗窒政協不如細路哥，就小氣、記仇兼唔大體喇！