影星任達華做主角演嘅《歲月神偷》啱啱喺柏林影展攞獎，佢哥哥警務處副處長任達榮尋日同傳媒茶敍時話，最初聽到個戲名，仲以為細佬係做小偷，點知原來係述說港人六十年代嘅奮鬥故事。任Sir話，曾經打電話畀細佬想恭喜佢，點知搵極都搵唔到，要喺電視先見到佢。
不過，兩兄弟好快碰頭，事關喺警隊工作咗三十七年嘅任Sir，將喺下禮拜五榮休，聽日會主持最後一次警察結業匯操，到時任達華會帶埋太太同女兒捧阿哥場。
講開警隊，港區全國人大代表譚惠珠尋日連走兩場，去完協進會新春酒會，又趕去警察員佐級協會致詞。佢話元旦嗰晚，本來安安樂樂喺屋企睇電視，點知見到班「80後」衝擊中聯辦，嚇到原本挨喺梳化嘅佢即時坐直嚟睇；過多幾日，又見到班「80後」包圍立法會，嚇到佢即時坐到梳化邊。
譚惠珠仲話，衝擊者都係一班大學生、年輕人，令人聯想中國歷史上一啲有唔同睇法嘅事件，但無論點，警務人員都保持克制，為被困人士解圍，做法文明。