新春之後，中電公布全年業績，有「中電一姐」之稱嘅中華電力香港業務副主席阮蘇少湄（Betty）病後復出，以短直髮新形象上陣，今次係佢舊年八月因患乳癌告假以嚟首次公開亮相，睇落靚咗又後生咗添。
Betty話，佢一月初已返工，每日返半日工，中電為佢度身訂造新職位，依家專責香港同華南地區嘅長遠策略發展，尤其核電方面，所以冇以前咁忙，身體亦好好。
八年前，Betty升任中電常務董事，成為中電百年嚟職位最高嘅華人女性，告病之後，中電都對呢位女將盡顯惜才之情，特登安排佢做另一個職位，而Betty又對新工作好滿意，話依家有多啲時間做運動同埋休息，笑謂希望新嘅一年有新嘅開始！
