鬍鬚曾任內第三份預算案前日公布，胡亂派糖之下，市民意見紛紛，有人話派糖「炒冷飯」，有人就批冇新意。理大英文專業傳意研究中心尋日公布咗個趣趣哋嘅研究，結果都幾得意，原來鬍鬚曾呢份預算案講得最多嘅字眼係「舊年」，其次係「出年」或「將來」，似乎鬍鬚曾對當下嘅重視真係唔及過去同明日噃！
理大英文專業傳意研究中心利用電腦軟件，分析預算案英文內容嘅用字頻率，發現鬍鬚曾嘅演詞中講得最多嘅詞組係「舊年」（last year），達二十次之多；其次係「出年」（next year），都有十九次；第三及第四位就係「發展」同「促進」、「關懷」等詞組。用得最多嘅單字則係香港（Hong Kong），共一百三十九次。
由呢個結果睇嚟，鬍鬚曾份預算案真係側重回顧舊年，前瞻未來，或者同政府嘅財政年度由每年嘅四月至翌年嘅三月有關，「今年」呢個字眼好易引嚟混淆，亦有可能鬍鬚曾對家吓真係關心少啲。