尖沙咀搬去荔枝角

今年係香港工業總會嘅五十周年誌慶，尋日佢哋為位於荔枝角嘅新總部搞咗個啟用儀式，亦為一連串嘅慶祝活動打響頭炮。呢個新總部佔地逾二萬呎，唔單只裝修富時代感，仲新增咗展覽廳同宴會廳添。主席孫啟烈透露，個會有過億元嘅儲備放喺銀行，為免被通脹蠶食，決定買物業投資，舊年八月以七千五百萬元一筆過買入呢個新單位。

由於現址開揚又夠大，佢哋之後決定將總部搬過嚟，再將尖沙咀漢口中心嘅舊總部租出去。據了解，工總咁樣做每個月可以穩袋十七萬租金，一年就大拿拿袋成二百幾萬，難怪孫主席好滿意啦！佢仲話以前搞午餐會，因為地方唔夠要捱飯盒，依家有宴會廳起碼可以安排到會。

好似工總咁樣嘅搬竇大行動其實早喺私營界別出現，但政府未起添馬艦政府總部前，已經有好多意見認為唔應該佔用黃金靚地，即使起咗，立法會早前都有個動議辯論，要求政府部門遷出黃金地帶，開拓較偏遠地方，但政府就話之你。前日，鬍鬚曾先喺預算案宣布已完成將灣仔三座政府大樓嘅部門遷離現址嘅研究，但連搬遷時間表都冇。佢美其名此舉係為活化工廈牽頭，但頭唔係已經畀人牽咗喇咩？