今時今日，內地黑心食品愈嚟愈多，奸商愈嚟愈大膽，以前只係喺山寨廠偷偷地生產，依家居然開班授徒，市面出現好多食品加工培訓班，教食品「保鮮」，學費唔平㗎，收成三千蚊咁多。

有學員良心發現，向傳媒踢爆黑幕，講出嚟嚇你一跳，嗰啲導師就好似馬戲團嘅魔術師咁，乜嘢都可以變得出嚟。你嫌豆腐乾唔夠白咩？放落雙氧水浸吓，就變得雪咁白。嫌芽菜唔夠新鮮？好，開啲保鮮粉浸吓佢啦。咦，條魚好似死死吓噃，唔使驚，滴啲柴油落魚身上，佢就會生蹦活跳，不知幾生猛。

佢哋仲會講畀你聽，呢啲「保鮮」過嘅食品唔會食壞人。如果你信以為真，就弊傢伙，原來雙氧水會令腸道黏膜受損，引起潰瘍、發炎。咁保鮮粉又係乜料呀？就係用嚟洗塑膠嘅工業原料，叫做二亞硫酸鈉。而長期食滴過柴油嘅魚，會傷害腦部神經。

叮佢個鎯鎯，呢班奸商好無良啫，為咗賺錢，根本唔理消費者嘅健康，話之你典床典蓆啦。咪搞，以後都係唔好貪平返內地食嘢喇，唔係嘅話，容乜易連命仔都冇埋。

唔好以為留港消費就可以避開黑心食品，不妨舉個例，香港人食嘅蔬菜大部分由內地供應，本來粵港雙方已確定一批供港菜場，啲菜都經過檢驗，照理唔應該有問題。食環署食物安全中心仲話，百分之九十九點九供港蔬菜，殘餘農藥都唔會超標咁話。

但係，呢幾年本港街市賣嘅蔬菜多次驗出農藥殘留物超標，仲發生過全家食菜心中毒事件。原來食物安全中心話就話喺口岸設咗檢查站，可惜檢查人員太馬虎，係咁意睇吓，有標籤就放行，好少抽驗。走私客就偷龍轉鳳，將未檢驗嘅菜當好菜運入香港。

最恐怖嘅係，班官員就算發現咗問題，都唔會跟進。例如食物安全中心曾經發現供港芹菜、芫荽含有一種叫做水胺硫磷嘅有毒化學物質，但係冇喺全港跟進，市民可能食咗毒菜仲矇查查。

叮！問題蔬菜只係冰山一角咋，實際上，呢幾年內地發現嘅問題食品，包括蘇丹紅鹹鴨蛋、孔雀石綠魚、毒奶粉同奶製品等等，都流入過本港。內地有乜嘢，香港就有乜嘢，唔食死人都要燒香還神咯。

不過，你估成日都咁夠運嘅咩，政府如果仲係唔嗲唔吊，始終會整鑊杰撻撻嘅，到時睇班官員點向全港市民交代。唉，睇嚟靠政府係唔得喇，市民都係自求多福啦。