冇參與五區「公投」嘅白鴿黨同終極普選聯盟，自從同公社兩黨分道揚鑣後，近日好似亂石投林咁周圍搵親北京人士求助，希望佢哋幫手鋪橋搭路安排佢哋上京，就政改問題同中央對話溝通。不過全國政協常委陳永棋尋日出席一個新春酒會時話溝通喺香港都做到，唔一定要上北京，質疑泛民純粹做騷。前全國人大常委曾憲梓亦認為泛民要有更多實際行動表達誠意，先創造到同中央溝通嘅條件。
有白鴿黨高層坦言依家佢哋嘅處境可以話係左右做人難，首先佢哋選擇咗唔同公社兩黨一齊搞「公投」，就預咗流失部分激進泛民支持者。如果最後真係爭取到中央作出某啲讓步，令白鴿黨喺立法會嗰九票可以名正言順「轉軚」支持政改方案，咁都可以箍番部分中間溫和選民支持，但如果中央寸步不讓，令佢哋被迫跟埋公社兩黨一齊再次否決政改方案，咁就兩邊都輸到盡。
為免出現呢個雙輸局面，白鴿黨最近已不斷將佢哋對政改嘅底線同訴求降價，明顯幫緊自己鋪定下台階。該名黨高層仲明言，希望中央喺五月十六號五區補選投票日之前作出有關承諾，因為過咗嗰日，公社兩黨肯定會將「公投」失利嘅責任推晒畀白鴿黨，將該黨講成出賣港人嘅民主叛徒，到時無論中央作出乜嘢讓步，佢哋都好難再冒險轉軚支持政改。
該黨高層坦言佢哋早已表明會交由會員大會決定係咪支持方案，啲會員都係睇民望去決定點投票，如果最後民意對有關讓步唔收貨，黨高層都冇符喎！