香港人生活緊張，歎下午茶食個撻、歎杯咖啡鬆一鬆，都變咗人生樂事。全國政協委員、華商會所主席黃守正都鍾意歎下午茶，但佢唔好吔撻，而係鍾意食番件會所餐廳出品嘅蝦多士。黃守正話唔係賣花讚花香，上任做主席以嚟都唔知餐廳有款鎮店之寶，半年前聽會所名譽會員范徐麗泰極力推介，先知道正斗美食原來近在咫尺。
黃守正話佢哋會所嘅蝦多士係用越南虎蝦加新鮮麵包炸成，食時點埋他他汁，入口香脆又唔膩，甚少食下午茶嘅黃守正都話一試難忘，最鍾意邊食蝦多士邊歎多杯特製咖啡。
會所嘅咖啡用上多種咖啡豆溝成，味道濃淡適中，唔帶苦澀味。咪以為喺高級會所食下午茶好「乸脷」，柯打一份蝦多士同咖啡只係三十九蚊，絕對係街坊價。不過會所餐廳只招待會員，想品嘗招牌蝦多士就要搵會員帶路先得嘞！