本文重點
尋日喺香港中華出入口商會新春團拜，撞到佢哋喺立法會嘅代表「象哥」黃定光，講起新年外遊見聞佢就滔滔不絕，原來佢年初二到訪湖南臨湘，飲姨甥結婚喜酒，點知枱上碟碟辣菜，為免失禮主人家惟有頂硬上；捱過呢餐，又遇着當地食肆通通無辣不歡，就算叫碗清湯撈飯都辣到噴火。
遊張家界望多兩眼
幾經辛苦終於喺酒店搵到一味白麵包夾蛋白醫肚，結果喺湖南六日餐餐啃包，冇啖好食，佢仲笑言後悔冇帶公仔麵去食添。
不過，好彩畀佢發現咗一味小食，就係湖南臭豆腐，呢款豆腐以秘製黑色滷水汁製成，雖然賣相唔多討好，但味道完全唔辣，象哥有名「肉王大帝」兼且乜都食，一於照擦可也，結果一食就停唔到口。
此外，佢仲遊覽埋風光如畫嘅張家界，話近期賣座電影《阿凡達》都喺嗰度取景，當然要望多兩眼喎。