香港八大專上院校嘅校長日理萬機，平時忙到飛起，要近距離接觸佢哋都唔容易，但有人仲想黐住校長一日，發夢冇咁早啩？話說一名台籍美國女碩士生忽發奇想，以「校長一日的工作」做畢業報告題目，於是send封email畀港大校長徐立之要求黐住佢一日。本來佢都諗住會石沉大海，結果喺三十六小時內就成功得到校長首肯。嗱！咪以為係癡人說夢話，一封email就搞掂。
呢位現年三十歲、美國伊利諾大學香檳分校嘅教育碩士生陳小靖，本來趁假期嚟香港旅行，初四send email畀校長，校長唔單止畀個驚喜佢，尋日仲搵專車接佢一齊出席傳媒新春聚會，又為佢冠名「校長影子」。徐校長笑住話，今次係第一次有外國學生跟住佢，好新奇，仲讚：「My shadow is prettier than me（我個影子仲靚過我）！」
小靖全程跟實校長，睇住校長招待嘉賓同傳媒對答等，好驚嘆咁話：「大學有這麼多發展計劃，用多少錢、幾年建好等，他全部記住了！」仲大讚校長社交手腕柔中帶剛，對答流暢。