卿姐掌財委會受讚譽

若果唔係秘書處數番出嚟，可能大家都唔留意，原來立法會三個常設委員會入面，即係財務委員會、議員個人利益監察委員會同政府帳目委員會當中，其中兩個都係由女將做主席把關。好似財委會咁，之前審議高鐵撥款搞到滿城風雨，做財委會主席嘅白鴿黨副主席劉慧卿，同時畀泛民同建制兩派一齊攻擊，搞到裏外不是人，不過最後都順利解決，無論資歷深淺嘅議員都對卿姐嘅裁決感到滿意，真係少啲耐力同牙力都唔掂。

另外，喺十八個一般事務委員會入面，由女將做主席嘅都有四個，比率佔百分之二十二，比立法會內女議員佔百分之十八嘅比例為高，女議員有幾勤力真係可想而知。

唔單止咁，立法會內唔少棘手事件都係由女議員掌權，就好似調查甘乃威係咪有求愛不遂怒炒女助理一事，一開始大家將個波踢咗畀議員個人利益監察委員會，諗住由委員會主席「蘇菲」梁劉柔芬搞掂佢，但最後唔成功，又要成立獨立調查委員會去做，最終調查委員會主席都係蘇菲，即係個波始終都踢番畀女議員。

零動議議員全屬男性

依家唔係話男議員唔勤力，不過早前一個監察立法會議員嘅組織都指出，全年冇提過動議或修訂案嘅五個議員全部都係男性，唔多唔少都會令市民覺得男議員「冇咁打得」，睇嚟各位男議員如果唔想畀女議員爬頭嘅話，真係要加把勁喇！