小白觀點：成就超柏林豬肉獎

勁呀，中國人又有揚威世界嘅力作喇，今次得到德國人嘅高度讚譽，頒咗個「金鼻子剽竊獎」畀我哋，表揚我國有大量作品入選當地一間老翻博物館，真係可喜可賀呀。

計我話，呢個獎嘅重要性，比起港產電影得到水晶熊獎更值得中國人驕傲。唔係咩，柏林電影節嘅獎好似某電台搞嘅分豬肉頒獎禮咁，人人有份，連搞細路嘅變態佬都有獎，含金量有幾高，真係可想而知。

所以話呢，特區政府真係捉到鹿都唔識脫角，其實香港背靠祖國，面向國際，最有資格起一個極具規模嘅老翻博物館，如果搞得成嘅話，假嘢藏品數量多到行三日三夜都睇唔完，而且唔使好似西九文化區咁要向外國招聘話事人喇，我國大把造假人才，一於重金禮聘華南虎專家周正龍做CEO！

e-mail：sunsiupak@gmail.com

Blog：http://sunsiupak.blogspot.com

阿豪觀點：中國貨點會冇原創

德國設計界創立逾三十年嘅「金鼻子剽竊獎」，乃係A貨界嘅最高榮譽，今次國產山寨貨竟然喺十一個獎項裏面囊括咗五項。呢個獎項嘅主辦單位可能正喺度沾沾自喜，以為咁樣就可以落我哋中國人面，仲可以諷刺我哋淨係識抄人。佢哋真係咁諗就大錯特錯喇，如果係咁意頒個獎就可以杜絕A貨，咁美國佬頒咗咁多年金草莓獎，荷里活咪冇晒爛片？一樣長拍長有。

事實上，呢個所謂金鼻子獎唔單止唔可以寸到班山寨商人一戙都冇，反而仲會當正個獎係Q嘜標誌咁，貼喺門口度當生招牌：「呢嗱，連生產國家都話我哋神似o架！」有內地學者承認，依家我國研發能力弱，產品技術低，中國貨暫時未能提升到「中國創造」嘅層次，咁講唔單止妄自菲薄，記性仲奇差添—你當蘇丹紅蛋、三聚氰胺奶粉等偉大創作冇到o架？

e-mail：lukchiho75@hotmail.com

Blog：http://lukchiho.blogspot.com

網友觀點……

陳福水：聽講菜園村想複製，不妨請內地老翻專家幫手吖。

波 迷：假如國足能老翻出一個世界級球星，咁就好喇。

陳 真：侵權貨都肯買，個獎應該同佢哋分享喎！

老翻對外辦：老外粗暴干涉我們老翻事務，我們表示強烈不滿！

有料爆：

黑心食品開班授徒，睇怕快有黑心大學。

SMS傾埋一份：6016 2496